政情：阿毛反口 退黨撬友

分手極狠 大爆黨內是非

一向同黨友「貌合神離」嘅阿毛早前宣布退黨，開記者會時力數公文袋不是，仲大爆黨內內訌嘅情況，可以睇到佢哋嘅分手非常不快。不過，佢當時強調自己一定唔會「呼朋喚友」拉隊離開公文袋，仲話「之前唔會，以後都唔會」，實牙實齒咁，但「政治一日都嫌長」，阿毛退黨只係兩個星期，就已經有公文袋中人大爆，阿毛三個心腹，包括林綺梅、曾愛華同埋葛思恆都緊隨其後退出公文袋，即係代表阿毛已經反口。其實，阿毛喺黨內一向得罪人多稱呼人少，估唔到都有人肯跟佢退黨。

對於反口拉人退黨一事，阿毛就解釋，「咁大個人點帶佢走先，退黨嘅事問番當事人」，又話佢哋三個退黨前無知會，係退黨後通知，至於三人之後會唔會去阿毛度幫手，佢就話「咁無聊唔答喇」，又話「有咩問番公民黨喇！」

話說上次執委會選舉，做過兩屆青年公民副主席嘅阿毛前心腹李俊晞，本來打算競選青年公民主席，但佢竟然爆冷輸咗畀一直外借咗畀民主動力、無乜參與黨務嘅黃俊傑，估計都係受阿毛退黨餘波所累，而被冷待。

公文袋人促還廿萬競選費

除咗拉人退黨之外，公文袋內亦都有意見認為，阿毛拎咗黨資源參選，當選唔夠兩個月就火速退黨，係過橋抽板，無政治道德。雖然阿毛話黨內對佢嘅資助少之又少，但有人計過條數，話黨內對佢資助至少有二十萬元，阿毛分手時咁樣數落公文袋，有黨內建議該黨要叫佢「回水」，睇嚟阿毛咪以為抽身而退就甩難。