中國著名女作家楊絳說過：「有些人之所以不斷成長，就絕對是有一種堅持下去的力量。好讀書，肯下工夫，不僅讀，還做筆記。人要成長，必有原因，背後的努力與積累一定數倍於普通人。所以，關鍵還在於自己。」然而，香港的大學生「性福」滿瀉，好似理大咁，大學學生會於校內福利專門店除了免費派發避孕套，仲送埋潤滑劑，照顧不可謂不周到，而據云是為了推廣安全性行為及預防愛滋病訊息。
大學生膽大妄為已不再是新聞，早前嶺大學生會於李運強教學大樓對出掛上「大學自治，天經地義」直幡。老朽以為自己老花又嚴重咗，睇到「大學自絕，天經地義」，唔通佢哋覺今是而昨非，知道讀完大學都冇乜用，不如發起運動叫學生全部退學，每年慳番幾百億元撥款資助去扶貧，善心可喜可賀也。
之不過，原來老朽表錯情，佢哋係要求踢走特首校監，趕走傀儡校董，還學生共治的訴求。家陣大學生真係傲氣比天高，敢把校監校董踩在地，分分鐘振臂一呼：衝啊！直情佔領校長室，自訂校規自把自為，美其名「民主自決」，哈哈哈，革命豪情就是這樣練成的，爽啊！
阿哥，你哋郁吓就話要「自決」，就憑一股不知天高地厚嘅蠻勁？好，唔該嘔番晒政府嘅補助金，呢啲都係納稅人嘅錢。放眼世界，各地大學不斷調高學費，以美國為例，從一九九五年至二○一五年，非牟利私立大學學費每年平均由一萬九千美元增至三萬二千美元，公立大學則由四萬四千美元增至九萬四千美元。反觀香港，回歸至今資助大學學費不變，每年約四萬二千多元，你話在香港做大學生，不是身在福中是甚麼？然而，不少大學生有書讀卻不懂珍惜，未曾做過一件有益社會嘅事卻一味搞搞震，正如楊絳嘅名言：「你的問題主要在於讀書不多而想得太多。」