政情：胡志偉當選白鴿黨主席
民主黨（白鴿黨）尋日舉行換屆選舉，立法會議員胡志偉喺超過九成在席黨員信任票下當選為黨主席，至於副主席分別係羅健熙同沙田區議員李永成。不過，該黨上屆中委林子健，競選副主席同中委時雙雙落敗，難逃「雙輸」命運。
聲言同梁振英誓不兩立
胡志偉話該黨絕對同特首梁振英（CY）誓不兩立，未來喺地區動員反擊CY，要求CY下台；議會內就會團結泛民主派政黨，以合理和有效方式，令CY不可予取予攜，阻止CY連任，令社會回歸有效管治制度。
白鴿黨之前通過黨政分工議案，外間一直以為會由一位非立法會議員羅健熙出任黨主席。對於今次無參選，羅健熙話胡志偉當選主席將令黨內有更大得益，佢未來會幫助胡志偉落實黨政分工。
講到會唔會做一屆就交棒，胡志偉話希望今屆任期內可完成「黨政分家」修章，若果成功，日後將由非立法會議員任黨主席；若不成功，黨內可能要考慮換更好嘅人負責修章。咁咪即係只做一屆黨主席？佢就笑言目標係咁，不過「Never say never（永不說不）」喇！