政情：郭炳江學懂放下 踏人生第二階段
今年七月新地前主席郭炳江獲終院批准上訴並保釋外出多月，鮮有公開露面，尋日佢出席公司嘅活動時，亦向傳媒透露過去幾個月的近況。佢話依家好少理公事，交畀其弟、新地主席郭炳聯教導第三代，但佢仍會不時鼓勵加入董事局兩年嘅囝囝郭基煇，坦言自己人生已踏入「第二階段」：「個人要學識放下多啲，但我並唔係退休，繼續學嘢同做運動增值自己都已經好開心。」
凡事感恩 勉勵愛兒
父親喺過去兩年嘅經歷，郭基煇話令自己改變咗好多：「爸爸喺赤柱每日都有一個鐘頭跑步，每次都會跑足，對佢嚟講嗰一個鐘係佢最珍貴嘅時間，佢好渴望用嗰一個鐘去令佢自己心境開朗。」佢認為兩年來父親最大嘅轉變，係對所有事一句怨言都冇，凡事都抱感恩心態，「就算有咩唔啱都閂埋門講，好少話鬧，對我有好大嘅鼓勵，可以話係做咗我『啦啦隊』。」
郭炳江坦言要重拾新生活亦非易事，「自己全職讀神學碩士都幾忙，好多功課做，運動頭幾個月開始做番都好辛苦，好彩出嚟有班朋友支持，同個仔感情都深厚咗。」佢話會好好利用時間，自己都要爭氣啲，讀書方面佢不恥下問，不時向三十幾歲嘅同學求教。
另外，有傳媒報道指郭老太鄺肖卿嘅壽宴，郭炳湘、郭炳江同郭炳聯三兄弟都有到場，郭炳江指傳言其實有誤：「嗰日係媽媽生日，全家人一齊同佢慶祝，原本郭炳湘都會嚟，但係當日佢有啲事情去咗其他地方，所以無出席。」