政情：學民思潮 換殼復活
由黃之鋒牽頭嘅學民思潮喺今年三月告終，當時話會「一分為二」，除咗政黨香港眾志之外，仲會有新學生組織。事隔超過半年，新學生組織終於成立，名為「教育實驗學社」，而前學民發言人黃子悅亦有份參與，負責傳媒聯絡工作。不過，新組織同以前學民思潮差唔多，唯一唔同嘅只係換咗個牌頭同領導，似乎都係「換湯不換藥」，兼且佢哋嘅對象由中學生擴展至大專生，咁係咪同專上學生聯會（學聯）搶客呢？
新組織希望以學生為主體革新教育，仲會等學生透過了解、探索同反思自身嘅學習同成長，同埋與社會嘅關係。佢哋嘅關注範疇包括教學語言、評核方法、校內民主、赤化教育同埋不民主政策制訂。至於實際工作就會分為三部分，包括工作坊、研習社同埋議題及行動。
點解要醞釀逾半年先成立？佢哋話係因為要討論組織工作所以遲咗，仲因為咁而同公眾道歉。另外，佢哋亦話已正式向警方申請進行社團註冊，之後仲會向銀行申請社團戶口。然後佢哋就喺會計師監督下，將學民思潮之前剩番嗰七十萬元，全數撥入戶口。
堅稱與眾志冇從屬關係
新組織亦都表明，係獨立運作嘅學生組織，冇同任何組織有從屬關係，但佢哋班底都係前學民成員，再加上依家筆經費同香港眾志當初筆錢一樣，都係嚟自學民，好難唔令人聯想新組織同眾志有關係。黃子悅回應查詢時，亦重申新組織同眾志係冇從屬關係。
再講，新組織主要對象除咗中學生之外，仲有大專生。現有嘅大專生組織，除咗各大學生會，仲有學聯。新組織招攬埋大專生，少不免畀人覺得同學聯有「搶客」之嫌。不過，黃子悅就話唔應該用商店同客戶嘅框架，去睇學生組織同學生嘅關係，又話組織主要對象係中學生，同學聯嘅行動路線亦都有所不同。
其實當年學民都係以教育問題為主線，後期愈嚟愈投身政治，甚至解散學民再組織新政黨，呢個學社係咪會重蹈覆轍呢？大家拭目以待。