中環出更：運動藝術二揀一 江碧蕙棄畫從騎

冇見一排嘅Sherie依家搬返嚟香港長住，講起藝術，佢就透露原來細個嗰陣都學過書法同繪畫，仲攞過畫畫冠軍添！不過佢因為時間兼顧唔到，要喺運動同藝術之間選擇一樣集中發展，而好動嘅佢就梗係揀咗運動啦，因而造就咗佢後來成為女騎師。而佢嘅藝術天分，原來係遺傳自佢公公，事關佢公公係本地書法家，香港有間雲泉仙館依家用緊嘅部分牌匾對聯都係出自佢公公嘅手筆㗎，而佢早前都有去過參觀。

翟紹唐對貓有感覺

同場仲有翟紹唐同太太Susanna，見到今次展覽入面有唔少主題與貓有關嘅作品，翟紹唐就諗起童年時家中都有養過貓狗，所以對啲畫特別有感覺。佢仲話其實貓狗都可以和平共處，只不過貓對氣味好敏感，有時啲人摸完隻狗之後會發現隻貓唔理你，可能係因為隻貓唔鍾意隻狗啲味道，咪唔埋嚟囉！

今次展覽除以繪畫形式表達對社會嘅關注外，仲會將畫作同紀念商品嘅部分收益捐畀香港社區組織協會，幫助基層家庭及弱勢社群。楊素珊同陳竹君兩位藝術家，仲將畫作印製成四套精美茶杯，唔少名媛見到都話好靚，冇儲開畫都可以買番套杯返去用，夠晒格調又幫到人。

翟紹唐（左）同太太Susanna（右）對陳竹君（中）繪畫嘅貓特別有感覺。（湯佳樂攝）

油尖旺區議會主席葉傲冬（右）欣賞楊素珊（左）作品嘅用色夠醒神。

卓妮