好多人以為香港地今非昔比，早就冇「遍地黃金」呢支歌仔唱。其實都未必o架，睇吓嗰啲電話騙徒，漁翁撒網打盲毛，閒閒哋都呃到十萬八萬甚至幾百萬，呢啲咪就係網上最興講嘅「此地錢多人傻速來」囉！
呢，尋日有一名科大學生報案，懷疑被電話騙徒呃走八十萬人仔，即約九十萬港元；而再早幾日，一名中大女學生亦被呃走八萬港元。其實呢啲騙案嘅情節都係差唔多，都係受害人接到聲稱入境處人員嘅來電，話干犯刑事案件被通緝，要求開設一個內地銀行戶口證明自己清白，結果戶口嘅錢不翼而飛。唔講唔知，過去短短兩個月內，本港最少發生八宗涉及大學生嘅電騙案件，再次證明「橋唔怕舊，最緊要受」。
以前就話嗰啲咩祈福黨呀、寶藥黨呀、跌錢黨呀，專搵阿婆阿伯埋手，貪佢哋讀得書少容易落疊，但係今時唔同往日，莫講話飽讀詩書嘅大學生，學富五車嘅教授一樣中招。喺台灣，連做過中央研究院副院長嘅國際級學者，棺材本都被騙乾騙淨。如果騙子技術含量高，情節天衣無縫都話啫，其實佢哋來來去去都係三幅被，唔係有案在身，就係「重要包裹待領」；唔係自稱內地官員，就係扮成入境處人員。而且最諷刺嘅係，內地傳媒曾經踢爆，內地詐騙分子好多都係中學未畢業嘅無業遊民，居然將大學生、教授呃到氹氹轉，你話係騙子高明、人才輩出吖，抑或香港人太天真、本港教育制度太失敗吖嗱？
當然喇，市民一再上當受騙，荷包受損，本身固然有一定責任，但執法部門懶懶閒，一樣係助紂為虐。你知喇，科技日新月異，騙徒手法層出不窮，警方唔與時俱進，好易落後於形勢，弊在港產官僚次次都要到死人冧樓至做場大龍鳳敷衍民意，之後就當冇件事發生，咁搞法，香港有乜法子唔淪為騙子天堂吖。
冇錯嘞，打蛇打七寸，斬草須除根，打擊詐騙集團，淨係港產官僚做嘢係唔夠嘅。大家有眼見，過去兩年內地同香港警方聯手喺東南亞等地積極掃蕩騙徒，有關罪行一時間銷聲匿迹，證明好多嘢事在人為嘅啫。當然喇，殺頭生意有人做，只要風聲冇咁緊，犯罪分子就會蒲頭搵食，可見同詐騙集團鬥爭就好似玩扑老鼠遊戲咁，呢頭扑低一件，嗰頭另一隻又趷起身，瞌少陣眼瞓都唔掂o架！
話時話，國家領導人成日話「中國夢」，又話要令到港人對祖國「感到自豪」。可惜吖，內地近年經濟發展，國力上升嘅同時，禮崩樂壞，道德淪亡，儼然騙子大國，港人想自豪都難喇！