政情：岑敖暉鋪路做政治「逃兵」
學聯前副秘書長岑敖暉（Lester）自前年佔領行動後沉寂多時，尋日出席一個講座時提到年輕人參與政治活動嘅代價好大，仲舉本土民主前線梁天琦為例，指對方被剝奪政治權利同面對官司，而即將畢業嘅佢表明未有從政打算，明顯為退出政治運動鋪好下台階。
臨畢業決定退居幕後
因反港獨確認書被裁定失去參選立法會資格，又因參與旺角暴亂面對暴動等罪名嘅梁天琦，一早已潛水絕少現身，又透露即將去哈佛大學進修，一於遠走高飛做逃兵。對此Lester感同身受，話年輕人參與政治運動往往身不由己，「一係做先鋒，或者做逃兵」，而佢似乎揀定做後者。
原來Lester仲有兩星期就畢業，佢早前喺立法會選舉期間幫朱凱廸站台助選，後來獲對方聘任為兼職助手，據知佢畢業後將轉為全職，意味佢已選擇退居幕後。被問到會唔會再次擔任政治運動嘅「先鋒」，佢就含糊回答，話會願意繼續為民主理念發聲，至於從政與否，佢即時話未有打算，明顯係唔想再擔任先鋒角色。
其實作為佔中搞手之一嘅Lester仍然仲有得揀，真係要多得律政司檢控「歎慢板」，除咗佢之外，壹傳媒黎智英（漢奸黎）、佔中發起人戴耀廷等共四十八名佔中搞手，至今仍無一人因組織非法集會等罪名被起訴。