政情：立會走火警 鄺神再做小學雞
立法會尋日進行火警演習，一共有四百三十幾人參與，總共用咗十分零五秒時間抵達添馬公園集合點，比舊年快二十五秒。喺參與走火警嘅十三名議員當中，首次參與嘅民主黨鄺俊宇（Roy）話印象中上一次火警演習已經係小學年代嘅事，更講笑話自己「趕及最後一班（車立）囉！」
Roy解釋，佢同黨友涂謹申咁啱喺火警鐘響起前搭電梯，抵達地面時先響起鐘聲，估計呢程係響鐘前最後一班電梯。佢又話今次走火警嘅感覺同小學時差唔多，因當年大家走火警時都會笑住話「燒死喇」、「快啲走呀」咁，而今次大家亦都係「笑笑口」，但佢覺得立法會嘅火警演習較為謹慎，連參觀緊嘅學生都要走埋一份。
高佬賢象哥講爛gag
民建聯嘅蔣麗芸（Ann）、何俊賢（高佬賢）、黃定光（象哥）亦喺火警鐘響前先到達地面，再走到添馬公園，高佬賢仲開象哥玩笑，話佢「你咁長個鼻，應該幫手救人啦」，象哥隨即回話「噴咗水喇已經」。主席梁君彥亦好快抵達添馬公園，象哥笑指應跟隨梁君彥一齊走，梁君彥就話「如果走得快，就唔使搞成咁啦」。Ann就笑稱有六十幾個議員冇出現，需要救佢哋出嚟，仲話「假如要補選咪好慘囉！」