政情：謝偉俊掌UGL專委會 CY震騰騰
立法會早前應非建制議員要求通過成立專責委員會，調查特首梁振英（CY）收受澳洲公司UGL五千萬港元事件。負責籌備該專委會嘅小組委員會尋日召開首次會議，最後選出獨立議員謝偉俊（阿Paul）做主席，預計佢順理成章會做埋專委會嘅主席。阿Paul雖然係建制派一員，但佢本身有「反梁」紀錄，而建制派原定想選多個副主席（目及）實阿Paul，但最後就甩轆選唔到。特首選舉臨近，由反梁人士主導UGL事件調查，唔知CY有冇震騰騰呢？
籌備小組本來有十一名委員，建制派佔咗七人，非建制派只有四人。但尋日選舉主席時，阿Paul最後僅以一票之差，擊敗做過廉政公署調查主任嘅民主黨林卓廷當選主席，原因係其中兩名建制派委員經民聯嘅梁美芬同獨立何君堯，分別因身體不適及遲到等理由缺席。阿Paul、梁美芬同何君堯，都被外界形容為「西環契仔」或「西環契女」，兩人咁都甩底唔撐自己友，真係唔畀面，唔知係咪同阿Paul前日喺立法會大會上公開窒過梁美芬有關呢？
曾掛橫額叫換特首
阿Paul出名係反叛建制派，曾經喺街頭掛橫額要求換特首，其他建制派可能都想買個保險，建議籌備小組加多個副主席，並由疑似「梁粉」民建聯嘅周浩鼎出任，以便（目及）實阿Paul，等佢唔會亂嚟。點知到投票增設副主席職位時，梁美芬同何君堯仍未見影，加上阿Paul當時已做咗主席，依例冇得投票，最終議案喺四票建制派支持、對四票非建制反對下未能通過。
冇特權法 殺傷力低
記得大約五年之前，立法會喺泛民同「唐營」建制派支持下，成立咗個獲《立法會（權力及特權）條例》授權嘅專責委員會，以調查當時為特首候選人嘅CY，喺西九文化區設計比賽中涉及角色衝突嘅事件，目的係阻撓CY參選。雖然今次負責調查UGL事件嘅專委會並冇特權法授權，冇權傳召證人作供或強制索取機密文件，殺傷力應該冇當年嘅西九調查咁大。但如果阿Paul配合埋非建制議員，勢要對UGL事件一查到底，CY肯定有排煩。