中環出更：四議員遭覆核 陳曼琪出小鳳姐贈興
政府尋日再度入稟高等法院，就社民連梁國雄、劉小麗、香港眾志羅冠聰同建築界姚松炎四人嘅議員資格提出司法覆核，非建制派議員隨即由立法會遊行到特首辦抗議。但另一邊廂，中小型律師會協會創會會長陳曼琪（Maggie）喺佢嘅facebook（fb）上，貼出印上歌手徐小鳳名曲《喜氣洋洋》歌詞「熱烈地彈琴熱烈地唱」嘅相片贈興，同埋話支持政府嘅做法。
繼工聯會立法會議員陸頌雄早前以自拍短片方式，唱出小鳳姐嘅《喜氣洋洋》，用作歡迎高等法院裁定青年新政游蕙禎同梁頌恆喪失議員資格後，Maggie尋日亦以小鳳姐嘅名曲贈興。
支持者期待展歌喉
Maggie嘅相片除咗印上「熱烈地彈琴熱烈地唱」嘅歌詞外，更配上CD作相片框。另外，佢亦貼文指「我們就是需要這種勇於承擔的政府」，又指自己忍唔住要學小鳳姐。其實，Maggie本身都係唱得之人，喺七月份仲發表一首創作歌曲《創新一天》，仲即場唱Live添，既然佢忍唔住要學小鳳姐，點解唔索性唱埋出嚟呢？
其實，有唔少支持者紛紛喺fb留言，指「等你上載MV」、「恭喜你出唱片」等等，似乎大家都期待緊Maggie再展歌喉。
卓妮