中環出更：飲食服務業「首」重待客態度
早排有調查指港人英文水平下降，而卓妮日前喺中小型企業聯合會舉行嘅「星級品牌頒獎典禮」上遇到煌府集團主席陳首銘，佢就話其實喺飲食業嚟講，員工的英文水平唔係最緊要，反而着重服務態度。以佢哋酒樓為例，就算間唔中有外國客人，其實睇吓個菜牌啲相都識點菜，冇乜大問題。
陳首銘話通常佢哋啲菜牌除咗食物嘅圖片外，仲有埋英文對照，所以就算員工同顧客語言不通，都可以配合肢體語言，用手指一指都會明，落單都唔會有太大難度嘅。佢仲話員工除咗廣東話外，同客人用普通話對答嘅機會亦比英文多，所以對英文水平嘅要求唔高。而佢早年就有到外國進修讀咗個同飲食業有關嘅短暫課程，順便又學吓英文。
黃傑龍呻請人難
敘福樓集團執董黃傑龍就苦笑話飲食業已經好難請人，如果仲要咁多要求就更加唔使旨意請到咁話。而佢哋旗下嘅日本餐廳亦唔會要求員工識日文，就算佢同日本人傾生意好多時都只係用英文，又話依家好多日本人嘅英文講得非常好。雖然係咁，佢早排都真係有去學日文，不過就發現年紀大咗先開始學真係辛苦啲喎。
做零食生意嘅僑豐行行政總裁黃偉鴻認為語文好好未必代表賣嘢叻，相反業績好嘅同事又唔一定係語文好、詞彙豐富，重點係佢能唔能夠了解客人有乜需要，並且要滿足到兼令客人購物過程滿意開心，表達嘅嘢清晰就得喇，所以英文好唔好都係其次咁話，當然識就最好啦。
卓妮