肥彭呢位過氣政客專門搞搞震唯恐天下不亂，佢老哥「回魂」返港出席論壇，左一句「港府管治無能」，右一句「香港禮崩樂壞」，果然係狗口裏長不出象牙。之不過面係人哋畀，架係自己丟，如果港府施政唔係冇靈魂冇神經，十足十殭屍咁款，又點會畀到位人入吖！
想知呢個政府到底有幾廢，睇吓最近發表嘅審計報告就得。今次上榜嘅衙門足足有十幾個之多，一次過打破晒過往紀錄，食環署、消防處呢啲常客固然冇走雞，連教資會亦被揭發，單係開會支出短短十年間就暴升逾三倍，簡直係沒有最醜，只有更醜。唔怪得「東方報業民意調查」顯示，大部分受訪者批評港產官僚能力不足，醜聞不絕；因循苟且，猶如殭屍。
市民絕對唔係無理取鬧o架。試諗吓，淨係一個消防處就被揭出十八宗罪，連串甩轆，大大話話令庫房唔見成億，點到你唔服。最離譜嘅係，該處第三代調派系統未驗收就投入服務，結果頻頻故障，搞到一鑊泡。查實本報早喺○五年已經大篇幅報道系統各種甩漏，點知消防官僚一味玩拖字訣，十一年後嘅今日問題依然未解決。大家揭吓份審計報告，就會發覺好多「疑難雜症」都係熟口熟面嘅老大難問題，滲水辦處理個案長期hea做，成效不彰就係典型例子。咪畀人睇死，港產官僚意見接受，態度照舊，審計署鬧得幾兇狠都好，最後咪又係嘥心機捱眼瞓。
有學者就講得啱嘞，官老爺之所以錯而不改，教而不善，講到尾都係因為唔使問責及受罰，好官我自為之。話時話，審計署口號唔係「衡工量值」嘅咩？試吓官僚賴一次嘢扣一次人工，睇吓佢哋仲有冇咁老定！
好多人都有一個疑問，點解同一支公務員隊伍，回歸前被譽為全球最具效率嘅，回歸後即刻走樣變調，發展到依家直頭係三日一小鑊，五日一大鑊？點解大部分受訪市民都批評港府冇威信、冇權威，再唔係好似舊時咁戰戰兢兢，步步為營？不妨打個譬喻，同樣嘅食材，御廚可以整出色香味俱全嘅佳餚；落喺庸廚手上，唔食物中毒都算偷笑。大家有眼見，歷屆政府管治班子一蟹不如一蟹，特別係今屆政府，更加係濫竽充數，拉雜成軍，上樑不正下樑歪咯喎，有咩法子唔烏煙瘴氣，七國咁亂吖。家陣連肥彭都忍唔住乘機抽水，話要教精港府咩叫「善治」喎，你話係咪羞家吖。
正如孟子話事偈︰不賢者而居高位，是播其惡於眾也。庸官劣吏一日霸住茅坑阻住地球轉，七百萬市民想有運行都幾難！