今日對御宅族嚟講係一個重要嘅日子，皆因係一年一度嘅「絕對領域日」。每到呢個時候，日本網絡就會湧現各種着住迷你裙、過膝襪及露大腿嘅性感相同自拍照。話時話，「絕對領域」其實係指乜呢？
「絕對領域」係日本御宅族文化中嘅詞語，意思指穿着迷你裙同過膝襪時，大腿露出嘅部分，領域，就係指呢一片大腿。呢個詞語源自日本動畫《新世紀福音戰士》當中嘅「絕對領域」（Absolute Terror Field，又稱「AT力場」）。動漫中嘅領域具有將「自我」及「他我」，跟客觀世界分割開嘅能力，簡單嚟講即係人嘅心理屏障。御宅族就用呢個理念，套用喺呢片令人想入非非，卻又神聖不可侵犯嘅小小大腿肉之上，並喺御宅族中流行起嚟。及至2005年底，日本電視節目《電視冠軍》（TVチャンピオン）其中一位參賽者，將呢個詞語公諸於世，從此被日本主流社會所使用。
睇少女大腿感覺好似好邪惡，其實佢嘅理念相當單純，皆因佢不過作為「萌」，亦即可愛嘅一種特徵。另外，日本嘅御宅族對界定設有仲有相當嚴謹嘅標準：迷你裙（以肚臍為裙嘅高度上限）、絕對領域同過膝襪膝頭對上至襪頂，3者嘅黃金比例為「4：1：2.5」，當中嘅誤差值唔多於25%。有日本網民驚大家睇唔明，仲整埋張圖出嚟，等大家容易啲理解。
其實日本有唔少嘅諧音節，而「絕對領域日」之所以定喺11月28日，皆因「1128」呢組數字嘅日文諧音為「いいニーハイ」，意思即指好正嘅及膝襪咁解。由於「絕對領域」嘅理念係從審美角度出發，故此每年嚟到呢日，不但有唔少日本網民響應，將各種自拍「絕對領域」相上傳到網絡，當中更有唔少藝人、模特兒，甚至男性參與添！
「絕對領域」話就話本義係純潔嘅，但想入非非嘅感覺始終先至係重點，而日本AV迷喺網上選出心目中最強嘅「絕對領域」AV女優，佢就係緒奈萌。呢位喺1996年12月15日出生，並喺今年1月以AV片廠kawaii*專屬女優身份登陸AV界嘅佢，不但樣貌可愛又擁有一對修長美腿，更最愛以過膝襪示人，並經常喺社交平台上載自拍「絕對領域」相片，因此被AV迷視為「最動人嘅絕對領域」。有見及此，kawaii*喺今個月初推出名為《絕對領域 苗條女子校生 緒奈萌》嘅新作，以滿足AV迷對緒奈萌絕對領域嘅幻想。
雖然早喺2005年底「絕對領域」已經衝出御宅族，並漸漸成為日本社會上廣泛使用嘅詞語，但講到以佢為題材嘅寫真集，卻要到2011年1月底先至面世，佢就係由日本影美少女影到出晒名嘅攝影師青山裕企所攝製嘅《絕對領域》。曾奪得「CANON寫真新世紀」優秀獎嘅佢，最拿手嘅地方就係捕捉美少女身上部位嘅美態，而呢本《絕對領域》更係開正佢嗰瓣。書中攝下各種迷人嘅領域，除咗有少女外，亦有唔少輕熟女。憑住大量嘅領域靚相，令呢本寫真集成為「絕對領域」嘅經典之作。
每個寫真攝影師對「絕對領域」嘅定義都有唔同嘅解讀，好似喺呢本由日本著名攝影師古賀學所炮製嘅寫真集《水中Knee Socks》，雖然仍保留對過膝襪，及展現美少女萌味嘅堅持，但冇咗迷你裙嘅界限，模特兒甚至只係穿着泳褲。縱然佢同御宅族眼中嘅領域定義有啲分別，「絕對領域」加上「水中攝影」嘅元素卻帶出全新感受。事實上，呢本喺2013年8月推出嘅《水中Knee Socks》，只係佢「水中絕對領域」系列嘅頭炮作，跟住仲有2014年嘅《水中Knee Socks Plus》及2015年嘅《水中Knee Socks Cube》。今年8月，佢喺東京原宿舉辦咗名為《Ultra怪獸水中Knee Socks化計劃》嘅攝影展，實行將「絕對領域」理念堅持到底！
「絕對領域」嘅魅力可以大成點？有人喺2013年11月2日，成立咗一個名為「日本過膝襪協會。據協會會長三橋脩太表示，佢有一日見到穿着過膝襪嘅少女時，內心有種難以形容嘅快樂，尤其係喺過膝襪同迷你裙之間嘅「絕對領域」，散發出可愛到極點嘅魔力，自此佢就迷倒過膝襪嘅魔力之下，而尋找點解過膝襪有咁嘅魅力，就係呢個協會成立嘅原因之一。協會另一個目的，就係希望透過各種攝影活動，將過膝襪呢種時尚文化宣揚到全世界。為咗實現佢嘅理想，協會先後搵嚟超過50名美少女模特兒，影咗大量「絕對領域」靚相，並舉辦過多個攝影會外，今年8月協會更推出首本寫真集《絕對Knee Socks》，讓大家感受「絕對領域」嘅魅力。
網址：http://kneesocks-project.com/
撰文：魂