探射燈：市民慳度聖誕 零售愁迎歲晚
聖誕節向來是傳統消費旺季，惟今年聖誕與農曆新年相差只一個月，不少市民為「慳皮」，將兩大節日所需消費，合二為一，多個行業已打定輸數。有髮型屋負責人預料聖誕生意較去年同期下跌三成；服裝店老闆指現時客人消費意欲不大，由以往一次買四件新衣，改為一件；而從事美甲生意的店東預計聖誕及農曆新年生意大減，由以往人均消費千多元，減至約四百元，節日預約仍未爆滿。經濟學者更指，由於人民幣匯價持續下跌，內地旅客來港購物沒有着數，或會大幅影響聖誕、農曆新年的本港零售銷情。
「聖誕同農曆新年相差咁近，唔少客都話留到農曆新年前，先嚟染髮。」下月便是聖誕節，往年不少市民都藉着佳節，精心打扮一番，惟銅鑼灣一間髮型屋負責人李先生指出，面對今年的情況，港人通常會在農曆新年前，才一次過做漂染及剪髮，預計生意較去年大減三成。
髮型屋：與其他行業合作吸引消費
另一間髮型屋老闆Sky補充，因聖誕及農曆新年距離相近，不少客會選擇在聖誕做漂染及剪髮，「佢哋可能怕農曆新年前會加價啦，會早啲嚟整頭髮。我哋洗剪吹，喺農曆新年前，預期都唔敢加價，而由於電髮、染髮嘅成本上升，先加一成。」
他指出，因兩個節日相近，「啲客嘅預約逼埋晒一齊，可能做唔到咁多客，會少咗客。」為了增加營業額，髮型屋與其他行業合作，如染髮電髮送韓式蒸浴五折優惠券、梳子及洗髮水等，吸引客人消費。
除髮型界商機受損外，連一向靠傳統消費旺季「食胡」的零售界亦被拖累。專售韓式衣物的店主Nise指出，往年高峰期，不少顧客一口氣狂買四件衣服，現時連買一件衣服，也要左思右想。她預計聖誕及農曆新年的生意未必回溫，即使來貨價愈來愈高，也不敢加價；為了減省經營成本，只好預先由大舖搬細舖，「啲熟客以前個個月會嚟買衫，依家成兩個月先嚟一次。」
美甲店：預約未滿 節日「提早」收工
佳節更是美甲店的旺季，但一間美甲店店主阿寶亦預期，在聖誕及農曆新年生意會大減，「以往人均消費千多蚊，依家都係花費三、四百蚊，唔會花錢將指甲做得咁花巧。」她指出，在過往聖誕及農曆新年期間，經常做到凌晨二時，但今年預計只做到約深夜十二時便收工，「節日預約仲未爆滿，相信生意比以往差。」
經濟差匯價波動 港購物着數不再
珠海學院商學院院長何濼生表示，本港經濟持續疲弱，內需大減，加上人民幣匯價近期「插水式」下跌，變相減低內地旅客來港消費意欲，「內地旅客會覺得來港購物，着數不再，慢慢會轉去其他國家消費，加上環球市場波動、美元強勢等因素，香港嘅零售業會首當其衝。」
市民點睇
梁小姐（零售）：「聖誕同農曆新年點都會消費，但買嘅時候可能會諗清楚先。」
周小姐（學生）：「聖誕同農曆新年咁近，預算上會緊張啲，都未必會買咁多。」
圖／文：專案組