政情：肥彭陰魂不散 對釋法指手畫腳
末代港督彭定康（肥彭）近日再度訪港，今次已經係佢喺香港回歸後第七度「回魂」，而喺訪港期間又好似陰魂不散咁，繼續對香港事務指指點點，今次又喺全國人大常委會釋法事宜上指手畫腳。
斥游梁攞宣誓開玩笑
肥彭喺接受本港傳媒訪問時，大談青年新政游蕙禎同梁頌恆引起嘅宣誓風波，直指香港司法機構已經可以處理宣誓事件，唔明白點解全國人大常委會要堅持釋法，但佢亦批評游梁二人，話明白香港部分青年人感到沮喪，但亦唔應該攞宣誓嚟開玩笑。
除咗對宣誓風波指手畫腳之外，佢又指《基本法》同《中英聯合聲明》仍然足夠保護香港人嘅利益，即使九七回歸時有人質疑一國兩制嘅成效，但佢仍然覺得一國兩制多年來落實得唔錯。