政情：立會四新丁 合力抬轎
有協助殘疾人士外出嘅團體尋日舉辦抬轎比賽，讓大眾了解輪椅使用者外出嘅困難。四個立法會「新丁」尹兆堅、譚文豪、姚松炎同容海恩，合力抬起一個輪椅使用者繞住赤柱大街跑咗一圈，當其他議員大嘆要「好出力」之際，有健身經驗嘅尹兆堅就牙擦擦咁話過程輕鬆，仲話企同一邊嘅容海恩係女士，佢已經特別用多咗力添！
健身尹兆堅 牙擦嗌輕鬆
喺烈日當空下，四個議員合力抬起一名輪椅使用者跑近二百米，咪話唔辛苦，不過唔知係咪立法會經常要點人數，令班議員習慣跑去開會，所以呢次抬轎似乎都唔多喘氣。尹兆堅話過程輕鬆，只係要「出少少力」；至於身形較為瘦削嘅姚松炎就直言有點吃力，不過好在有幾個人分擔，都唔算辛苦。唯一女將容海恩就覺得幾有趣，話之後都有興趣再參與。本身係民航機師嘅譚文豪初次挑戰抬轎，可惜駕駛經驗對「抬轎」完全無幫助，佢話過程雖然唔算辛苦，但都幾出力。佢又話依家先知道原來的士有同樣服務，認為政府應該推行更多對殘疾人士友善嘅措施！