中環出更：名人保暖有法 齊向皮草說不
近日氣溫急降，更錄得入冬以來最低溫度，尋日卓妮見到一班名人去到沙田馬場觀賞賽事，對住咁空曠嘅草地為愛駒打氣嘅同時，四周不時有陣陣寒風吹埋嚟。講起保暖衣物，博愛醫院主席陳李妮就話唔會着皮草，話人造嘅皮草屋企就有，加上香港嘅天氣都未至於好凍啫，睇佢尋日仲摺起衫袖着裙就知佢唔多怕凍啦！
陳李妮話，以前嗰個年代大家環保觸覺未有咁強嘅時候都曾經着過皮草，但後來知道原來皮草係點樣製作之後就唔再買，佢認為依家人造嘅假皮草，無論手感以至保暖程度，都拍得住真嘅一樣，笑言連價錢都差唔多，所以唔存在着真皮草較貴氣嘅理論。佢依家買啲衫如果有毛毛領或袖口，佢都會問一問老闆係咪仿毛先買。
劉燊濤拖老婆手取暖放閃
香港工業總會青委主席劉燊濤（Gary）同太太吳奕筠同樣一聽到皮草就耍手擰頭，Gary話依家真假皮草的確好難分辨，所以佢同太太索性唔買有毛嘅衫，咁就實唔會買錯，咁冬天點算？佢就話以「多」搭夠，笑言最凍嘅時候會着五件衫喎。佢太太就話貼身衣物好緊要，話保暖底衫作用好大，再凍啲嘅時候可以加埋頸巾、帽同耳罩，包住最怕凍嘅地方，咁就萬無一失。不過最重要係，Gary話自己多數係隻手凍，除咗拎暖包之外，拖住太太隻手互相取暖最有效。嘩！好曬呀！就算幾凍太太都當堂暖晒啦！
除咗皮草，羽絨嘅生產過程都被質疑唔人道，公司生產滑雪服嘅觀塘區議會主席陳振彬就話佢哋冇生產羽絨，話依家啲人滑雪都唔着羽絨o架喇！事關有好多高科技物料如瑞士嘅人工棉等，無論保暖或保持濕度上嘅表現都比羽絨好得多，仲薄過羽絨添！
卓妮