本港旅遊業得番半條人命，缺乏利好消息，所以早排有大型郵輪首次宣布全年以香港為母港，商務及經濟發展局局長蘇錦樑即刻撲出嚟報喜訊，話有信心明年高增值旅客會有可觀增長喎，點知話口未完，唯一連接啟德郵輪碼頭嘅街渡服務宣布今晚摺埋，連一條街渡航線都養唔起，仲學咩人講吸客吖。
講真，呢條來往觀塘公眾碼頭至郵輪碼頭嘅街渡，今年四月啟航時已經劣評如潮，唔單止收費貴過巴士同小巴，而且只有星期六、日及公眾假期提供服務，再加上宣傳不足，開幕時得三丁友捧場，連小貓三、四隻都冇，能夠撐得到今日，已經算係一個奇迹。雖然話街渡摺埋之後，會由原本北角至觀塘嘅渡輪接手經營，順便去埋郵輪碼頭，但除咗原有班次，平日全日都係得四班咁大把，可見真係冇乜需求。
正所謂皮之不存，毛將焉附，郵輪碼頭啟用至今三年多，使用率一直未達預期，雖然停泊嘅郵輪逐漸有所增加，但仍有接近三分之二日子丟空，平日大部分時間都係冷冷清清，莫講話街渡乏人問津，連商舖都叫苦連天，大部分時間十室九空，拍晒烏蠅，之前甚至試過有商舖因為拖欠工資，搞到滿城風雨，最終執笠收場，街渡服務無以為繼，又有咩出奇吖。
冇計喇，郵輪碼頭設施甩漏多多，每次有郵輪泊岸都搞到七國咁亂，甚至出現過幾千名旅客喺的士站打蛇餅嘅奇景，趕客之極。本來呢，碼頭吸引唔到外地豪客，搞多啲活動聚吓人氣，推動吓本地消費都不失為一件好事。有業界人士倡議將碼頭發展酒吧一條街，帶旺人流及消費，可惜又係民熱官冷，不了了之。
有人計過數，郵輪經濟錢途無限，淨係內地市場，未來十至十五年估計就有五千億元人民幣規模，香港分到個零頭已經飲得杯落，問題係啟德郵輪碼頭姍姍來遲，本來已經先天不足，軟件、硬件方面又輸競爭對手一截，簡直係後天失調。好似旅行過境咁，人哋新加坡早就推出區內海空聯航服務，方便同一日搭飛機離境嘅抵岸旅客可以喺郵輪中心辦理登機手續，行李仲有專人代送往機場添。早前有學者發表報告，話隨着愈來愈多亞洲地區進軍郵輪行業，本港繼續不思進取，遲早失去競爭優勢，唔係危言聳聽o架！
所以話，港產官僚冇嘢叻，最叻就係化神奇為腐朽，香港水深港闊，加上背靠內地，近水樓台，發展郵輪經濟潛力無限，家陣咁大舊叉燒擺喺度都食唔到，除咗怪自己唔爭氣，仲有咩好講吖。