政情：黃卓健執靚垃圾房做議辦
元朗區議員黃卓健（Legward）結束咗一年無殼蝸牛嘅生活，近日終於喺天水圍天華邨搵到個垃圾房改裝做議員辦事處，尋日開幕就吸引咗唔少立法會議員到嚟捧場添！佢個辦事處行簡約工業風，有別於傳統辦事處，難怪個個參觀完都讚不絕口，更話想倣效Legward喇！
採用蔗渣板造傢俬
Legward個新辦事處裝修好特別，保留原始風而無鋪地板，而且部分電線外露。入面大部分傢俬都用蔗渣板造，牆身髹上白色並貼上佢嘅座右銘，除咗白光管亦有鎢絲吊燈作為點綴，更特別係辦事處由垃圾房改建而成，但一啲異味都無，難怪大家可以咁放心喺入面切燒豬開餐。
Legward話，作為建制派年輕一員，希望做好包裝等啲年輕人唔好咁抗拒，從而接觸到唔同選民。連辦事處都可以有咁大發揮空間，咁Legward屋企係咪都一樣咁特別呢？佢就話屋企太多持份者，一定要聽佢哋意見，所以裝修只係好普通啫。