自由黨「去田少化」後，該黨主席張宇人（Tommy）立即獲委任做行政會議成員，事件更冇通知身為榮譽主席嘅田北俊，令對方大發牢騷，話Tommy入行會就應辭任黨主席，以免兩個身份出現衝突。Tommy尋日接受電視台訪問時，重申唔會辭任黨主席，因為若然個黨對某啲政策嘅立場與政府唔同，大可跟行會立場投贊成，其他黨友就照投反對，田少當年做行會成員時都係咁。
Tommy仲爆料指，○三年七一遊行五十萬人上街後，自由黨決定跟民意反對廿三條立法，但係都有叫田少跟番行會立場照投贊成票，係田少自己決定辭任行會成員一齊倒戈。當年田少辭職除咗導致廿三條立法失敗，亦引發時任保安局局長嘅葉劉淑儀辭職。
講開葉太，田少細佬新民黨副主席田北辰（二少）尋日被問及Tommy入行會嘅問題時，罕有地力撐佢大佬嘅講法，形容黨主席兼任行會成員猶如「一腳踏兩船」，令所屬政黨隨時變成「政府黨」，好似韋小寶咁「又要反清又要保皇」。眾所周知葉太現時正係身兼新民黨主席同行會成員，二少呢番話似係暗寸葉太，多過單純支持自己大佬。有傳二少即將退出新民黨，並開始四處招攬人才，密謀另起爐灶，睇嚟可能好快就會發生。