政情：肥彭招魂傘 港英餘孽齊撐
末代港督彭定康（肥彭）近日再度訪港，係佢喺香港回歸後第七次「回魂」。佢尋日出席一個有關香港管治嘅論壇，喺台上大談民主自由、人權法治等陳腔濫調，內容缺乏新意。最精彩嘅反而係台下，主張香港重新「回歸」英國嘅戀英戀殖人士賴綺雯，喺肥彭致詞時，就喺座位撐起英國紅白藍色米字旗雨傘，疑似想幫肥彭同前港英殖民地政府「招魂」。
批評港獨不智 無可能實現
呢招室內打傘招魂術最後果然奏效，大批港英餘孽、牛鬼蛇神空群而出，包括外號「漢奸黎」嘅壹傳媒黎智英、外號「李漢奸」嘅民主黨創黨主席李柱銘、外號「民主阿婆」嘅前政務司司長陳方安生，仲有前廣播處長張敏儀、前行政立法兩局議員李鵬飛等，齊齊現身論壇為肥彭回魂贈興。就連因為喺宣誓時「宣獨」而被取消立法會議員資格、並以「支那」字眼辱華嘅青年新政梁頌恆，亦都有出席撐場，認真熱鬧！
不過，如果呢班港英餘孽以為今次肥彭回魂，係為咗幫佢哋對抗中港政府、帶領香港回歸英國殖民管治，咁就真係太天真同幼稚喇。肥彭喺答問環節重申，英國將香港歸還中國已成事實，香港獨立更加係不智同無可能實現嘅。
自言過氣 暗示英人唔出手
李漢奸之後仲未死心，直接詢問肥彭返到英國後可為香港做啲乜？肥彭就自言已經過氣，要由香港人自己嚟做英雄。佢又指自己都想英國國會同傳媒為香港做多啲嘢，但年前英國國會一個委員會計劃來港調查一國兩制嘅落實情況，亦因中方反對而擱置。即係話港人想造反就請你靠自己，英國人唔會幫忙。
論壇結束後，肥彭被問到對各名疑似下屆特首候選人嘅看法、如何評價現任特首梁振英同對方應否連任等，佢都一概拒絕評論。但唯獨係問及曾任肥彭私人秘書嘅財政司司長曾俊華（鬍鬚曾）時，佢就讚揚對方係一位好好嘅私人秘書。睇嚟鬍鬚曾想唔認自己係港英餘孽都幾難囉！