樹欲靜而風不止。呢排香港風起雲湧，唔止寒潮來襲，港獨思潮甚囂塵上先至最大鑊。點知咁啱得咁蹺，尋日就驚爆懷疑走私軍火事件，雖然實情係點仲要查過至知，但亦敲響警鐘，原來香港唔止係貨物轉運港，仲可能係軍火走私港添呀。
係咁嘅，一艘由台灣高雄出發前往新加坡嘅貨櫃船前日途經香港，海關進行例行搜船時，發現部分貨櫃嘅貨單名稱唔清晰，相當有嫌疑，一睇之下竟然係多架裝甲車，仲有一批疑似爆炸品添。由於呢批軍火事前未有申報，更冇軍事物資入境許可，即係走私咁解，海關不敢怠慢，即時將現場查封，仲一度急召警方拆彈專家協助。初步相信有關裝甲車屬於新加坡陸軍「星光部隊」，應該係結束台灣訓練後運回新加坡嘅，至於點解喺申報時遮遮掩掩，有咩不可告人嘅秘密，就要繼續調查。
話時話，今次事件引發全城高度關注，海關如臨大敵，唔係冇道理（口架）。你知喇，家陣港獨勢力猖獗，兩隻港獨小學雞搞出人大釋法兼被褫奪議席，早就有人揚言要全力反撲，前排嘅「佔領西環」只係第一波咋。喺呢個敏感時刻截獲大批軍火，難免令人有所聯想，你話唔驚就假咯。
大家一定記得，港大學生會刊物曾發表民族自決論，大言不慚咁話要勾連台獨、疆獨、藏獨同埋外部勢力，組織軍隊，驅逐駐港部隊，獨立建國；兩隻小學雞亦坐言起行，走去台灣同台獨大佬勾肩搭背，仲寫公開信畀台灣總統要求收回新界主權添。咁仲唔止，另一港獨組織早前亦啟程去日本同蒙獨分子開會，仲煞有介事話下次將會係「國與國會面」喎。再講吖，警方曾破獲港獨分子喺舊片廠製造炸彈，證明佢哋搞武裝鬥爭唔係得個講字咁簡單，土製菠蘿就話殺傷力有限啫，萬一癲到走私大殺傷力武器入境，嚟一招玉石俱焚，香港想唔變敍利亞都幾難。
唔係危言聳聽o架，好似今次事件咁，大批裝甲車及疑似爆炸物由台灣而來，申報資料又唔清唔楚，惹人懷疑好正常啫。仲有呀，海關呢十幾年間亦破獲多宗走私軍火案，既有重型機關槍，又有坦克車，甚至連米格戰機都有，裝備一支軍隊話咁易。所以話，最怕有人賊佬試沙煲，今次就算唔係走私軍火，下次就好難講咯。
都係前人講得啱，世道衰微，邪說暴力有作。家陣香港亂象叢生，港府又好似殭屍咁冇神經冇靈魂，乜嘢奇怪事都會發生，隨時爆大鑊都似。