政情：胡世全選特首 倡每人派一萬蚊
繼退休法官胡國興後，報稱從事工商物業投資嘅五十七歲民建聯前成員胡世全尋日亦宣布參選特首，主打「全民創富、健康及保障」，政綱包括承諾向每名香港市民派一萬元。
喺一○年立法會新界東補選同上屆特首選舉落敗嘅胡世全，話三年前已成立商會籌備今次參選，但坦言仍未聯絡任何一位選舉委員會委員，依家亦無需要約見中聯辦官員，佢稍後會透過朋友相約委員，有信心喺宗教、會計、工商同律師等界別攞到票，打破上屆「捧蛋」嘅尷尬紀錄。
政綱鼓勵市民多菜少肉
佢喺介紹政綱時多次提到全民創富，話若成功上任，會向全港市民派發一萬元，以鼓勵佢哋實行理財規劃。佢亦支持落實全民退保，部分政綱更非常「接地」，如鼓勵市民多菜少肉同多做運動，話市民身體健康可減輕醫療負擔喎。