政情：回歸20載 肥彭回魂7次

肥彭尋日中午抵港，仲由佢一手提攜嘅前下屬、「民主阿婆」前政務司司長陳方安生親自到機場貴賓室接機，對前上司非常禮待同恭敬，仲為肥彭開路添，兩粒無晒政治能量嘅舊電池認真臭味相投。

敏感時刻訪港 搞搞震冇好嘢

今次肥彭來港，聲稱會出席一個論壇，心水清嘅人都睇得出，此行點會咁簡單吖！佢喺九八年、○五年、○六年、○八年、一○同一四年先後六次訪港，美其名係出自傳加推廣新書，幾乎次次都食番個蛋撻，但喺留港期間都會同佢啲舊部下會面，仲對香港嘅政局指指點點，說三道四。

好似肥彭喺○五年訪港，當時香港就政改方案爭拗，而○六年佢再來港，政改方案被否決，佢就煽風點火，話香港係有自由但無民主嘅地方，雖然多年來已具備普選條件，但市民冇投票權選出領導人。

及至一四年港獨思潮冒起，肥彭以英國牛津大學校監身份訪港，佢出席香港海事博物館展覽活動時，數十名人士手持英國旗及港英旗到場贈興，佢留港期間更聲稱香港過去數年民主發展受到壓迫，並發表英國人離開香港前可以為政改做多啲嘢嘅言論，簡直係推波助瀾，及後更被外交部駐港特派員公署點名批評佢「罔顧事實，顛倒黑白」。

「民主阿婆」開路 藉機挑起事端

現時政府對港獨束手無策，早前因青年新政游蕙禎及梁頌恆宣誓辱華風波搞到立法會一度癱瘓，雖然有全國人大釋法，加上法庭裁定取消二人議員資格，但風波尚未平息。肥彭喺呢個時間訪港，以佢過往嘅紀錄，肯定又會借機月旦香港政事，恐怕又會搞出另一場風波。

肥彭呢啲咁嘅做法，就好似業主收番層樓，佢就以舊租客身份擅自闖入人哋間屋，仲瞓埋人哋張床，瞓完仲嫌張床唔好瞓，用完人哋個浴室沖涼，又大彈浴室唔夠乾淨，凡事都要指指點點，挑起事端。至於民主阿婆就充當舊看更，幫肥彭呢個前租客搞事開路，真正業主唔掃你走已偷笑。