中環出更：楊章桂芝教路 老闆唔使扮霸氣
一個成功嘅總裁除咗要有過人能力同管理下屬之道外，仲會不時散發一種令人尊敬嘅獨特氣場。卓妮早前喺活動上見到後生時已經創業嘅新華旅遊董事總經理楊章桂芝，講起佢一直當啲員工仔女咁看待，有乜嘢都教晒佢哋，咁唔知佢年輕時又有冇特登喺打扮上下工夫，增添番幾分老闆嘅霸氣？佢就話着高踭鞋一定有，但笑言唔係為咗營造威嚴形象，純粹係因為當時興啫！反觀今時今日呢個年代，佢認為冇乜所謂，老細着乜嘢都唔緊要，平底鞋一樣得喎。
總裁協會早前舉辦第六屆理事會就職典禮，德國寶董事長陳國民擔任今屆理事長。講到威嚴，又高又唔易笑嘅陳國民一行出嚟就已夠晒氣勢，但咪以為佢不苟言笑，當晚佢同「電鑽大王」鍾志平、港鐵主席馬時亨，以及唔領薪嘅「一帶一路」專員、「無糧專員」蔡瑩璧喺台上清談變咗棟篤笑，氹到大家不知幾開心。
莊偉茵打扮着重踏實
轉頭見到中電企業發展總裁莊偉茵，見佢戴咗副新眼鏡，佢話覺得做佢呢行最緊要畀人感覺夠踏實，所以款式簡簡單單嘅淨色眼鏡就啱晒嘞，加上佢經常要集中精神對住電腦睇文件，戴眼鏡冇咁易攰。
同場仲有協會副理事長陳啟豪及梁甘秀玲同埋時尚作家王麗儀。話說梁甘秀玲嘅老公係粵劇界「丑生王」梁醒波嘅醫生兒子梁乃業，難怪佢哋個仔梁智宏對形象都非常關心，仲向相識多年嘅王麗儀請教穿衣之道添！陳啟豪就戴咗隻非常特別嘅陶瓷煲呔現身，經營迷你倉生意嘅佢話，而家忙於同政府溝通及加強監察租戶存放嘅物件確保冇人違規等。
卓妮