笑看天下:失了才知上天厚愛

希拉妮未能締造歷史成為美國首位女性總統,敗給大嘴巴難免意難平;這一如大婆發現老公偷食,總愛狀甚無奈:個死佬,都唔知貪隻狐狸精乜好,老娘哪一忽唔及佢?又有消息話希拉妮把落選歸咎聯邦調查局局長高銘,責怪佢好做唔做偏在最後關頭宣布重新調查「電郵門」;唉!希拉妮看來不懂反躬自省,自己若乾淨清白,對方哪有縫可鑽,這是「怒不應怒無怒之物」,這怒,有失一個精英的身份。

其實,有啲嘢,失了才知是福,才知是上天嘅厚愛;有啲嘢,爭得到可能累你一世。一個人嘅健康及精神,好難呃人,老朽這種衰翁最清楚,青壯時追風跨欄雄姿英發,如今上落梯級膝頭哥痠弱,跑幾步氣喘如牛,是以在野村寫字讀書,沒必要甚少到處跑。希拉妮出來競選,穿起套裝表面依舊亮麗,笑容燦爛充滿信心,之不過,就在九一一紀念儀式上,她忽然頭暈提前離場,還曾數次因嚴重咳嗽而中斷競選演講。為了證明身體健康,她公布了一份醫生簽名的健康報告;為了證明沒患老人癡呆症,她甚至在一口水騷節目上徒手開醃菜罐頭,這難免予人「此地無銀」的聯想。

曾經出任四屆美國總統嘅富蘭克林‧羅斯福,是二次大戰的中心人物,人到中年得了脊髓灰質炎,在電視不普及的時代,他可以用廣播電台嘅「爐邊談話」傳遞信心和健康信號,不過指揮戰爭都係好傷神嘅事!雅爾塔會議,幾個巨頭在慶祝酒會上杯上杯落了四十五次。兩個月後,羅斯福病逝於任期。法國記者皮埃爾‧阿考斯在《病夫治國》一書分析羅斯福生命最後幾個月,發現他面色發灰,醫生沒意識到總統動脈硬化嚴重,並評估為普通感冒,結果出事喇!

特朗普雖比希拉妮更大一歲,然七十歲是否「一飯三遺矢」吾人未能得知。不過希拉妮曾為第一夫人也位極人臣,為健康做不成總統,老朽認為是上天對佢厚愛也。