政情：立會文豪 見「瞻」讀「膽」
上屆民建聯（民記）立法會議員鍾樹根經常爆金句，好似將「子虛烏有」錯當成「子烏虛有」，畀人質疑佢嘅成語認知水平不足。今屆亦有議會新丁錯讀成語，公民黨（公文袋）嘅譚文豪喺民記張國鈞要求將中國歷史列為必修科目嘅動議發言時，話自己並唔反對將中史獨立成科，但對以特首梁振英同教育局局長吳克儉為首嘅教育當局冇信心，期間佢仲將「馬首是瞻」讀咗馬首是「膽」。「文豪」竟然讀錯字，唔怪得畀人笑喇！
之後民記嘅劉國勳起身發言時，話聽到文豪錯讀「馬首是瞻」一詞，佢話呢個成語典故源自春秋時代晉國會同魯、齊、鄭、宋等國進攻秦國一事，本身「馬首是瞻」一詞係指士兵按馬頭來決定前進方向，比喻士兵服從指揮或共同進退，佢寄語文豪要多讀歷史，咁樣對於了解成語有幫助。
楊岳橋製驗眼圖笑黨友
文豪事後承認自己「擺烏龍」，又到處宣揚佢嘅助理同黨友楊岳橋事後為佢度身訂造驗眼圖，仲話叫本身係醫生嘅黨友郭家麒為佢驗眼添！