澳門政府尋日宣布連續第十年派錢，相信唔少香港人恨到口水都流埋。同樣係特區，同樣係一國兩制，點解人哋澳門年年有錢派，人人有份，皆大歡喜；我哋香港人就兩手空空，怨聲載道呢？
今次澳門政府派錢，例牌菜又係大手筆。永久居民九千大元，非永久居民五千四百元，另加醫療券六百元、住宅電費補貼維持每月二百元，加埋養老金每月三千幾、敬老金八千，以及豁免房屋稅首三千五百元稅款等，不一而足。唔講唔知，原來澳門政府最開頭只係向永久居民派五千元，家陣幾乎翻咗一番咁滯，你話唔恨死隔籬就假嘅。
最難得嘅係，澳門近年經濟並唔係一帆風順，內地打貪導致博彩業收入放緩，旅遊業亦連帶受到拖累，但人哋政府唔單止冇借頭借路閂水喉，反而進一步加碼，政府甚至講到明，即使澳門過去兩年博彩業收入「低空飛過」，但特區財政仍有盈餘、財政儲備仍然穩健，暗示長派長有。反觀我哋呢位鬍鬚財爺，唔理庫房點樣水浸，民生點樣困苦，淨係派過一次錢咁大把，仲要牙痛咁聲，最慘係呢位孤寒財主仲磨拳擦掌覬覦選特首，問你死未。
講到呢度，港產官僚一定駁嘴，授人以魚，不如授人以漁，一味派錢唔係辦法。其實，口號講到曉飛都好，點都唔及得現兜兜袋落市民銀包咁實際！更何況，人哋澳門唔係一味「花錢買平安」咁簡單，當地政府近年致力拓展經濟增長點，特別係積極同中山、珠海等珠三角西部城市融合，更加係做咗唔少工夫。
當然喇，公帑唔會從天上跌落嚟，亦唔會從樹上生出嚟，澳門堅持派錢，講到尾都係睇好長遠發展。大家有眼見，回歸後澳門社會穩定，經濟有聲有色，市民安居樂業。澳門發展經濟嘅最大瓶頸之一係地方不足，不過由於中央幾年前送咗成個橫琴畀澳門打骰，面積足足係澳門市區嘅三倍，無後顧之憂咯喎，前景自然一片光明喇！
人比人，比死人。香港回歸十九年，亂足十九年，社會爭拗無日無之，正經嘢無人理，一味搞政治鬥爭，近年甚至有人叫囂港獨自決，搞到家嘈屋閉，永無寧日，最慘係港府無能，對呢股歪風邪氣放任自流，養癰遺患，最終逼到中央親自出手釋法收拾殘局。澳門就唔同嘞，晨早自動自覺就《基本法》廿三條立法，消滅「澳獨」於無形，你幾時見過人哋有立法會議員宣誓玩嘢o架？
始終都係嗰句，禍福無門，唯人自招。昔日會生金蛋嘅香港每況愈下，市民恨做澳門人，講到尾咪因為港府無能囉！