曾經有人話過唔同年紀嘅男士，佢哋所留意嘅女性部位亦有分別，只係呢種講法未免太過籠統，事關只要係美女嘅話，佢身上任何一個部位都係咁迷人，好似南韓車模李恩惠，唔單止擁有美艷樣貌同埋出眾身材，一雙修長美腿亦相當誘人，更有「賽車道上嘅美腿女神」嘅稱號。
出生於南韓大邱嘅李恩惠，喺就學時期已經憑住迷人樣貌及出眾身材，而成為大家嘅焦點。當時嘅佢雖然擁有天賦嘅本錢，但卻未有投身模特兒界嘅念頭，反而希望成為時裝設計師。及至2011年初，喺一次偶然嘅機會下參與模特兒嘅工作，由於佢外形出眾，被經理人公司睇中力邀佢成為全職模特兒，呢個時候佢下咗一個改變未來事業發展嘅決定，正式宣告出道，同年10月佢參加F1方程式南韓站網絡賽車女郎比賽，結果奪得冠軍，之後喺多個賽車活動中表演，以車模身份登場。不過講到佢真正人氣爆發，係喺2012年嘅賽車模特兒比賽，事關佢喺呢個比賽中，榮獲最佳美腿模特獎。透過呢次規模盛大嘅比賽，佢嘅名字不但為人所認識，更令佢嘅事業有更大嘅發展。自此之後，佢頻頻喺賽車場上亮相，憑住誘人嘅外形而深受賽車場及車展上嘅男士歡迎，而佢喺網絡上嘅人氣更係直線飆升，同時獲得「賽車道上最亮眼美腿女神」嘅稱號。
須知道作為一位專業嘅模特兒，總希望自己嘅演出範圍可以愈嚟愈廣，而恩惠亦有咁嘅心願，因此開始喺唔同嘅場合，以唔同類型嘅模特兒身份示人，好似佢喺電玩展中化身電玩女郎，又成為電競隊伍嘅專屬電競女郎。此外，佢擔任遊戲代言人，為遊戲進行廣告拍攝工作。隨住曝光率不斷增加，佢開始喺電視節目中現身。雖然大家嘅焦點總係離唔開佢美艷嘅樣貌同迷人身段，但其實佢除咗天賦亮麗嘅外形外，仲有大家一直所忽略嘅才能。先前所講，最初希望成為時裝設計師嘅佢，對於設計時裝同潮流觸角，擁有相當嘅造詣及眼光。另外，佢更擅長繪畫漫畫，曾經喺網絡上以另一個筆名發表漫畫作品，可惜因為模特兒工作太忙碌關係，所以有一段時間已經冇再執起畫筆。講到攝影更係佢嘅最愛，佢最鍾意影嘅並非風景，反而係人物至能夠吸引到佢嘅鏡頭，認為相對於風景，人物嘅神情最能夠打動到佢，而佢希望透過鏡頭嘅捕捉，將社會上唔同人物嘅神髓保留落嚟，並且打動到每一位睇過佢照片嘅人。不過話說回來，以佢現時忙碌嘅工作嚟睇，唔知幾時先至可以睇到佢嘅個人影展呢？
簡介：李恩惠不但擁有一對誘人嘅美腿，以及令人印象深刻嘅樣貌，作為一位專業模特兒嘅佢，可塑性極高，無論冷艷女神定係純真美女，佢都可以呈現出箇中神韻，從而打動每位男士嘅心。憑藉形象百變，令佢每次出現都能夠帶畀大家新鮮感。如果想了解恩惠多啲，就要留意佢嘅IG啦！
網址：https://www.instagram.com/eunhyeato/
出生地：大邱
身高：171cm
三圍：34、24、34
撰文：魂