公屋輪候時間愈排愈長，今年八月正式突破四年大關，更慘嘅係港府推算未來五年，公營房屋建屋量只及長策會目標嘅三分一，即係話上樓時間只會有增無減。但係運輸及房屋局局長張炳良似乎唔願意接受現實，尋日喺立法會房屋事務委員會上死撐堅持三年上樓嘅目標，仲話調整目標無意思，排緊嘅都仲係會排咁話。上樓目標係一個承諾，明知做唔到又繼續講，除咗係自欺欺人之外，就係想誤導市民以為仲有一個咁嘅合理期望，但咁做只會適得其反，事關睇吓條隊咁長就篤爆政府講大話，唔會再聽佢氹喇！
