政情:許華傑做象哥接班人味濃

因為早前有大閘蟹被驗出二噁英超標,搞到市民聞蟹色變。不過,每年都會請傳媒食大閘蟹嘅立法會議員黃定光(象哥)就無嘢驚,照舊搞蟹宴,仲帶埋黨友周浩鼎(Holden)同許華傑(Michael)出嚟擦蟹,唔通借機向大家介紹接班人?

承認將走上幕前

象哥已年屆六十七,所以下屆再競逐連任嘅可能性並唔大,而同行嘅Holden已成功入局,剩低嘅Michael又同進出口業關係密切,因為佢係中華出入口商會副秘書長,其父更為進出口界前議員許長青,所以下屆分分鐘由Michael接班。而象哥都開口話Michael已幫手處理政策事宜,而離開時Michael都陪同象哥同Holden返回立法會。至於Michael都承認會逐步走上幕前,接班部署真係呼之欲出。

另外,象哥大讚出席蟹宴嘅人士大膽無懼食安問題,但佢就保證所請嘅大閘蟹安全,因為啲蟹唔係嚟自太湖養殖場,仲話蟹不宜多吃,但不能不吃添!

第一手消息請下載on.cc東網iPhone/iPad/Android/Windows Phone Apps