政情：開會搶官員文件 長毛被逐
話說立法會發展事務委員會及房屋事務委員會尋日就橫洲事件舉行聯席會議，對於橫洲發展顧問公司奧雅納被揭發挪用政府數據為發展商新世界的項目規劃，多名議員要求政府提供與奧雅納嘅合約文件同懲處機制，而社民連議員梁國雄（長毛）因不滿發展局署理局長馬紹祥未能即場提交文件，竟然衝前搶佢嘅文件，最終被逐出會議廳。
其實喺馬紹祥講話手上冇相關文件，將喺會後提供文件之後，長毛就批評馬紹祥曾任公司高層，應該唔會唔帶文件開會，之後更衝到馬紹祥面前，搶走佢放喺枱面嘅文件，仲大叫「我依家懷疑你嘅誠信」，及後將文件轉交畀朱凱廸睇，長毛最終被逐出會議廳，佢離開前仲指「我就係拎你嘅嘢，公家資料嚟（口架），顧問公司拎就得呀？」
兩個位之隔嘅運輸及房屋局局長張炳良喺過程中亦有幫口，指「可能佢（馬紹祥）真係無帶」，及後張又舉手示意指代表政府提出抗議，「政府文件唔可以咁拎走」。立法會工作人員最終取回文件交還馬紹祥。