政情：鄉議局大樓借20萬整冷氣
新界鄉議局耗資兩億元嘅鄉議局大樓至今落成已有五年半，初期帳簿都係滿江紅，出租場地曾經試過租金太平，一二年亦試過加租，鄉議局主席劉業強（Kenneth）上任後，曾嘗試搞靚盤數，但至今大樓嘅出租率仍然唔穩定，仲要向執委會借款近二十萬元大修冷氣添！
出租率低 九月僅賺$2000
鄉議局尋日開會，話大樓八月蝕咗兩千蚊，而九月都係賺得兩千蚊，但以九月嘅出租率嚟睇，最貴租嘅大劇院超過四成半，次貴嘅演奏廳就超過兩成半，會議室更超過四成六，但仍然賺得兩千蚊，而目前預計本月及下月嘅大劇院出租率只有約兩成，演奏廳就有三成至三成半，會議室就只有一成幾至兩成幾，二樓活動室更加完全冇人租。
賺錢咁艱難，而大樓仲要做維修。話說早前民主黨租場時遇到壞冷氣，局方就話係製冷系統長期使用，向執委會借錢做維修，Kenneth就話大樓入伙已有五年，相信陸續都需要維修保養。
至於今屆選委會鄉議局界別有卅五人爭廿六個位，被問到係咪擺唔平，Kenneth就話唔係，今屆選委會選舉都較熱烈，整體參選人數較席位多三成，唔會阻止人參選，兄弟爬山，各自努力，希望無論結果如何，都唔好損害兄弟間感情。