政情：競選超級議席 阿王花500萬
立法會選舉過咗兩個月，候選人陸續向選舉事務處遞交選舉開支及捐贈資料。選舉從來唔係使得錢多就一定贏，好似出選俗稱「超級議席」、區議會（第二）界別嘅工聯會（工記）王國興（阿王）咁，競選開支高達五百零一萬元，而喺告急時所進行嘅「救急工程」都花費唔少，但最後都係贏唔到議席，好彩全數都係由工聯會捐贈，否則唔知佢會唔會係咁諗住五百多萬元可以買到幾多午餐肉呢？
根據阿王向選舉事務處提交嘅資料，佢足足花咗四百六十一萬元喺選舉廣告開支方面，當中包括花咗超過二百七十六萬元喺印製海報、傳單、橫額同小旗上，印製三十萬張年曆卡就用咗十五萬三千元，而原來幾乎有阿王就會出現嘅金鉸剪道具都要五百元一把。而阿王團隊都幾注重形象，單係影相就花咗二萬九千元，而佢同同屬工記嘅麥美娟更專門搵咗製作公司為佢哋搞誓師大會，淨計製作公司費用都要成九萬元。
面對嚴峻選情，阿王亦曾告急。其團隊喺選舉前夕就印過告急傳單、掌心雷卡等，仲喺本地免費報章賣廣告，廣告費六萬元一日，都咪話唔「乸脷」，但可惜佢最終都同超級議席擦身而過。相反，同係參選超級議席嘅民建聯周浩鼎，選舉使咗約四百九十幾萬元，但就順利進身立法會。
哪吒違規擺宣傳品嚴重
阿王雖然使咗五百萬元，但有工記埋單，相對一啲獨立候選人要自己承擔都咪話唔吃力。不過，參選新界東嘅西貢區議員方國珊（哪吒）就似乎吸金力幾強，使咗約一百三十一萬元選舉開支嘅佢就獲得四筆分別為二萬元、三十萬元、四十五萬元及五十萬元的大額個人捐贈，合共一百二十七萬元，換言之哪吒只需自己負擔四萬多元。不過，佢違規擺宣傳品嘅情況幾嚴重，有成四十一次咁多，阿王同新界東候選人李偲嫣都分別有三十次同二十七次。
講開李偲嫣，佢喺選舉就使咗七十六萬二千多元，影相要請兩個攝影師，每個九千多元，而佢本《情書》嘅排版設計費就要四千元，不過佢獲得嘅選舉捐贈就只得三萬三千多元，即係佢要自掏腰包七十三萬元喇！至於八月下旬宣布棄選新界西嘅自由黨周永勤都花咗一百八十九萬元，但就獲該黨捐贈近一百五十九萬元，都叫冇咁傷。