中環出更:做義工「曉」抗逆 助人自助

香港係國際大都市,但繁華背後,社會上仍有好多人等待援助。唔少名人就深明呢個道理,所以會抽空去做義工回饋社會,有「手套女王」之稱嘅林曉盈(Juliana)就透露,自己有逾廿年嘅義工經驗,佢認為做義工能夠以生命影響生命,但唔好以為做義工只係幫到有需要人士,義工本身都能夠從中有所得着,而自己更係人辦添!

港安醫院慈善基金早前舉辦籌款晚宴,身兼晚宴籌備委員會聯席主席嘅Juliana透露,做義工所接觸嘅都係面對緊逆境嘅人士,所以能夠從佢哋身上學習到堅強,以及面對逆境時點樣管理情緒。佢更話上年遇到事業低潮,但有賴當義工嘅經驗,先有助佢走出事業上嘅低谷,難怪佢咁鼓勵人做義工喇!

蘇瑋愉:為下一代樹榜樣

另一聯席主席蘇瑋愉(Jo)都係細細個就開始做義工,出席義工活動已成為佢日常生活嘅一部分,而佢更係家族中第三代為港安醫院當義工嘅成員。Jo認為義工應該要多接觸受惠者,因為能夠觀察善款嘅用途,亦都能感受到受惠者得到援助嘅喜悅,佢更話擔任義工能夠為下一代樹立榜樣,而且過程亦都能夠認識到新朋友。

港安醫院院長凌宏寶就分享同「叻人」共事嘅經歷,所講嘅叻人就係醫生囉!佢話從醫者嘅學業成績有番咁上下,而佢唔係讀醫出身,剛上任同一班醫生共事時就覺得有啲吃力,因為對醫療專業用語唔熟悉,增加咗溝通難度。不過,好彩佢係理科生,努力溫習下問題就迎刃而解。

卓妮

第一手消息請下載on.cc東網iPhone/iPad/Android/Windows Phone Apps