特朗普當選美國總統，到底佢會唔會實現競選承諾，喺墨西哥邊境修築「萬里長城」堵截非法入境者，全世界金睛火眼（目及）到實，特別係香港人，假難民犯案愈來愈猖獗，成為治安毒瘤，更加係別有一番滋味在心頭。
睇吓最新數字就知有幾大鑊。警方拘捕嘅非華裔人士連續三年上升，由一四年嘅六百幾人，增加到舊年嘅一千一百多人，今年頭十個月更加去到一千二百幾人。點解會搞成咁？有立法會議員就講得啱嘞，家陣好多未經審批嘅免遣返聲請人，喺社會上造成極大混亂，佢又引述《東方日報》對相關罪案嘅報道，證明假難民亂象已經威脅廣大市民以至在港少數族裔嘅安全添。
咪話功夫茶賣花讚花香，除咗《東方》之外，香港仲有邊間媒體鍥而不捨踢爆假難民禍港亂象？正因為《東方》不厭其詳報道跟進，港府想埋個頭落沙堆都唔得，最近終於宣布最快明年初向印度旅客實施入境前登記制度，凡未提供個人資料者將被拒絕登機，以防有人抵港後舉手聲請免遣返；另外又會增加人手審批免遣返聲請個案，希望由家陣每日十三宗增加到每日廿三宗咁話。
即係咁，對於港府姑息養奸，坐視假難民問題愈演愈烈，市民早就怨聲載道，問題係，只要人蛇湧港嘅誘因一日存在，即使登記制度再嚴密，再增加幾多人手審批個案，始終都係無補於事。好簡單啫，人蛇抵埗後一朝行街紙在手，即時好似攞咗免死金牌咁，有納稅人包食包住唔在講，鍾意嘅可以打黑工，再唔係大可考慮拍住黑社會食大茶飯，事關香港地警黑一家親，警隊高層甚至被指包庇人蛇犯罪集團幕後主腦，有咩好怕喎。
當然喇，假難民喺香港福利多多，上述只係小菜一碟。司法對假難民慈悲為懷，青天大老爺周不時大發慈悲，重金禮送假難民回鄉，真係唔嚟就執輸。咁都唔止吖，以往當局處理酷刑聲請個案，大多數以書面作出裁決，點知上訴庭早前作出裁決，容許原訴人要求口頭聆訊，成個程序即時拖長咗，假難民變相鍾意滯港幾耐都得，香港遲早陸沉。
所以話，行政、警隊、司法瓣瓣靠唔住，市民惟有旨意傳媒繼續發揮第四權揭弊揭醜嘅天職。當年毛伯伯話︰「罵我們是秦始皇，我們一概承認，可惜你們罵得不夠，往往要我們加以補充。」之前有個沽名釣譽嘅政客，語帶譏諷咁話要喺立法會成立「東方之友小組」，《東方》為民請命，當仁不讓，唔成立「東方之友小組」，唔通成立「假難民之父小組」咩！