混浴溫泉文化100%蠢蠢欲動

水着之選 片山萌美

如果問日男最希望嘅混浴溫泉，遇到邊個水着女優嘅話，可以話畀大家知，日男心水之選就係喺1990年出生嘅片山萌美。選佢嘅其中一個理由，皆因萌美擁有G罩杯嘅上圍之餘，樣貌更係甜到漏，絕對係男性心目中嘅女神！之於其他嘅理由，則係同混浴一啲關係都冇，好似有人話佢夠斯文，又有人覺得佢好有氣質等等。其實講咁多都係多餘，講到底都係因為佢好身材啫。

AV夢想 京香Julia

男人總係幻想多多，尤其係混浴一刻，就算個心冇乜嘢諗，對眼總會望一望。日本就有網上討論區曾經做過一個調查，睇吓喺日男心目中，最想同邊個AV女優一齊混浴，講多次，係眼看手勿動嘅混浴，結果係日本超人氣J奶乳神京香Julia大熱勝出。可能有人會問點解唔係波多野結衣、吉澤明步等人呢？理由好簡單，就係因為浸溫泉時，只有上半身露出水面，喺咁嘅情況下……大家明啦！話說回來，其實Julia亦係一個浸溫泉愛好者，每當佢有時間就會去唔同嘅溫泉充電。

最正混浴 酸之湯溫泉

日本嘅混浴溫泉存在已久，而當中最具名氣嘅，非位於青森市嘅酸之湯溫泉莫屬。呢間早於1684年開業，至今已有332年歷史，憑住以檜木建成嘅「千人混浴風呂」而聞名，早喺江戶時代已經係日本人嘅熱門浸溫泉勝地。雖然佢至今仍然保留傳統嘅混浴特色，但早年因為愈嚟愈多男士喺浴池中做出不當舉動，而令女士感到困擾。據溫泉嘅工作人員稱，曾經有10名男士同時光明正大（目及）實一名女士，因而令唔少女士唔敢再去。為咗避免呢種情況發生，佢哋開闢分為男女專門嘅小浴場「玉之湯」，等大家都可以安然浸溫泉。

地址：青森縣青森市荒川南荒川山國有林酸湯澤50番地

網址：http://www.sukayu.jp/Tops/index

受AV所累 不動之湯

有人認為AV片廠都愛以混浴溫泉作為色情題材，因而令混浴溫泉文化受到衝擊，更搞到人氣溫泉被迫暫時關門，講緊嘅就係位於栃木縣那須塩原市嘅「不動之湯」。呢個露天溫泉由一個自治會管理，並一直靠客人自律而運作，因此實際上冇人看管。有啲唔生性嘅AV片廠，好似SOD同Glory Quest就睇中呢點，竟然喺度取景拍AV。不過講到當中最「聞名」嘅，就係一間細型AV片廠櫻花企劃，由於佢經常喺度拍AV關係，搞到呢度變成野戰性地咁滯，管理會見到咁嘅情況，喺去年6月將溫泉關閉，喺兩個月後先至重開。由於呢件事喺日本廣泛報道關係，故此重開後已無AV片廠夠膽再嚟取景。

混浴同好會

隨住混浴溫泉規矩改變，近年令唔少女性重拾混浴嘅熱情。好似呢個Facebook群組「秘湯‧混浴溫泉守護會」，係為守護混浴溫泉傳統，並且推廣混浴文化而成立。佢哋除咗推廣混浴禮儀外，又舉辦講座，同大家介紹混浴文化。另外，佢哋又會定期舉辦混浴浸溫泉活動，以提升大家對呢種活動嘅興趣，並且會上載活動嘅照片。不過大家唔好諗多咗，皆因啲相都遮晒個樣同埋身體重要部位。

網址：https://www.facebook.com/onsen.tadano/

重新演繹

由於以前日本溫泉都係「野湯」嘅關係，好難分開男女專區，只係當時男女都會着衫浸溫泉，及至江戶時代先開始流行裸體浸浴。呢個時期由於有部分收費嘅「錢湯」，有「湯女」提供色情服務，故此喺1791年幕府嘅江戶地區頒布「男女混浴禁止令」，只係江戶以外嘅地區仍然有混浴習慣。隨住男女對裸體觀念轉變，為免女士喺混浴時因裸體引起尷尬，部分提供混浴嘅溫泉旅館不但唔再規定裸體浸泉，仲會為泡泉男女提供專用浴巾，從而令呢種傳統得以延續。

撰文：魂