政情：公民講場：覆核「堅」想輸 陳弘毅空擔心

繼八個非建制派議員因為宣誓加料被市民提司法覆核之後，有建制派議員都被質疑宣誓無效。有「長洲覆核王」之稱嘅郭卓堅尋日都向法院申請司法覆核，要求法庭頒令宣布特首梁振英及立法會議員黃定光、石禮謙同蔣麗芸嘅宣誓無效。身兼基本法委員會委員嘅港大法律系教授陳弘毅就話，市民要小心，唔好提出無勝算嘅訴訟，否則浪費金錢。不過，郭卓堅已表明入稟係因為不滿有反佔中司機入稟要求撤銷非建制議員嘅資格，強調自己係想「兩邊都輸」，咁講即係擺明不惜工本囉，陳弘毅又使乜幫人慳荷包呢？