政情：捉蛇失手被咬 侯強腫幾日
上水鄉事委員會主席侯志強（侯強）曾經徒手捉蛇，仲煮埋嚟進補，得閒又會打吓野豬，似乎無咩動物佢唔識捉。不過，老師傅都會有失手嘅時候。早排佢竟然被一條大蟒蛇咬到右手，隻手仲腫咗幾日都未消添！
侯強話，早前落車時，同行友人發現有蛇，友人大驚小怪，佢就自告奮勇上前捉蛇。佢分享捉蛇秘訣話，只要捉住蛇尾就唔會被咬到，最多只會纏住手臂咁話。當日該條蟒蛇接近兩米長，佢徒手已經能夠捉住，點知就大意被咬親，隻手腫晒。不過無論隻手有幾腫，侯強都冇去睇醫生，事隔幾日仍未消腫。
「上善若水」最終放生
條蛇咁大膽咬侯強，唔知下場係咪又被侯強食落肚？結果侯強當日冇殺生，放條蛇一條生路。佢笑稱，因為經過立法會選舉後，學識「上善若水」，又話「得饒人處且饒人」喎！