政情：劉國勳自爆情迷打機
上屆立法會討論被網民謔稱「網絡廿三條」嘅二○一四年版權（修訂）條例草案，乜嘢係「直播打機」考到唔少議員口啞啞。不過立法會新丁議員劉國勳（阿勳）就一啲都唔陌生，佢尋日喺facebook自爆細個係遊戲機迷，仲叫網絡紅人「達哥」直播玩三國志遊戲，畀佢搵番童年回憶添！
做咗議員 有錢冇時間
阿勳形容打機係男人嘅浪漫，細個嘅時候好想玩孖寶兄弟、薩爾達傳說等經典遊戲，奈何屋企無錢，只能夠去同學仔屋企睇人打。今日阿勳貴為議員，想買咩遊戲都得，但就無時間再打，只能喺網上睇人直播打機，「睇完當玩咗」咁話。其實今屆議會鍾意打機嘅唔止阿勳一個，另一新丁議員羅冠聰亦係打機高手，外號「電競聰」嘅佢曾經喺網上做直播打機嘅主持。唔知阿勳下次喺網上睇打機直播時，會唔會聽到一把熟悉嘅同事聲音呢？