政情：選戰傾家蕩產 何啟明周身債
今屆立法會選舉，民協全軍覆沒，而該黨出戰俗稱「超級議席」、區議會（二）功能界別嘅何啟明，輸咗議席不特止，仲輸埋成副身家！佢喺今次選戰中燒咗一百二十二萬元，但原來民協同黨友夾埋只係資助佢兩萬元，結果自己要硬食其餘百多萬元選舉開支，搞到周身債，事後仲要問街坊籌款回本，相當慘情，同另一個自動當選勞工界議員嘅工聯會何啟明真係命運懸殊。
立法會選舉結束咗兩個月，各參選人嘅選舉開支亦陸續曝光。超區涉及全港各區，各黨都會投放大量資源助選，但係民協唔知係無錢，抑或已經打定輸數，只係捐贈兩萬元出來，加上該黨元老馮檢基（阿基）價值六千多元的職員服務，以及其他捐贈，最終出戰超區嘅何啟明只獲約三萬四千元贊助，其餘超過一百一十多萬選舉經費就要自掏腰包。
四圍籌旗 靠街坊補貼
何啟明接受本報查詢時形容，為咗今次選戰「傾家蕩產」，仲要問屋企人同好朋友借錢，搞到依家有好大經濟壓力。佢話好彩有街坊支持，選舉後一百幾十咁捐畀佢，總算係回番少少本。至於有無後悔當日陣前棄選，佢承認覺得好可惜，但見到泛民保住三席，都叫值得咁話。
民協喺今屆立法會「滅黨」，一席都攞唔到，區議會版圖亦愈縮愈細，資源相信會愈來愈少，好彩何啟明仲有區議員份工養住自己兼儲番啲錢，唔似阿基咁「雙失」輸晒。不過，阿基做咗咁多年議員，應該都儲埋唔少，但有個錢都要慳住使先得，好似如果今次宣誓風波最終要補選，阿基又出戰嘅話，真係隨時乾塘都有之。
李偲嫣總開支76萬元
另外，參選新界東落敗嘅新民主同盟范國威，選舉開支高達一百三十萬元，其中新同盟就捐出十萬元，似乎好環境過民協。至於范國威嘅新界東對手李偲嫣，成個選舉亦用咗七十六萬元。李偲嫣選舉用嘅相片惹來網民熱議，質疑相片後期製作得太誇張，而翻查申報紀錄，為佢影相同設計造型嘅係一間廣告公司，如果偲嫣嘅宣傳相無大執過，咁拍攝真係神乎其技喇！