中環出更：議員論「特總」 有讚有彈
美國共和黨「狂人」特朗普爆冷當選美國總統，舉世震驚，亦成為城中熱話。多名立法會議員對呢個勁爆冷嘅結果睇法各異。有人驚特朗普如果真係兌現競選時提出各種具爭議性嘅政綱，世界可能會倒退一百年。有人就睇好佢嘅商界背景，或有助美國經濟走出低谷，仲話有本港紡織業界打算去美國開廠添！
紡織及製衣界議員鍾國斌（Felix）係樂觀派，佢話雖然特朗普經常口出狂言，不過上任後可能係第二個樣，就好似前總統克林頓曾經話過，唔會畀中國最惠國待遇，但係最後都係「講一套、做一套」。
鍾國斌：生意佬肯協商
Felix又話，特朗普係商人出身，生意佬都係肯協商嘅人，所以唔擔心會有大問題。而特朗普嘅商界背景或有助美國經濟發展，佢有做紡織嘅朋友就想去美國開廠，因為當地失業率高，容易請人，同埋估計特朗普上場後，可能會有優惠政策吸引外商投資喎！
議員楊岳橋就話，特朗普當選令佢「情感上好擔心」，因為特朗普份人估佢唔到，唔知出咩牌，如果佢真係兌現競選時提出嘅惹火政綱，世界可能會倒退一百年。議員劉小麗都話，佢有啲喺美國讀書嘅朋友覺得好沮喪，不過美國經濟低迷，有人企出嚟話要刺激經濟，唔多唔少都會有人認同。議員胡志偉就話，英國通過脫歐公投同特朗普當選，不約而同反映咗反建制情緒，認為作為政治人物要正視呢個世界趨勢喎！
卓妮