正所謂，出得嚟行預咗要還。兩隻港獨小學雞宣誓變宣獨兼辱華，引發人大出重手釋法，卒之唔衰攞嚟衰，玩死自己之餘，亦導致其他反對派政客因加料宣誓進入釋法「射程」之內，一樣未必可以笑到最後嘅咋。
仗義每多屠狗輩，一位司機大佬尋日入稟高院申請司法覆核，要求法庭推翻立法會秘書長及立法會主席裁定八名議員嘅宣誓為有效，頒令宣布上述八人違反人大釋法而喪失議員資格，同埋宣布佢哋嘅議席懸空。呢八個反對派議員宣誓時唔係加料叫口號，就係手持雨傘等道具，再唔係就斷句式龜速讀出誓詞，花臣多多，擺明違法，唔怪得小市民睇唔過眼，憤而入稟喇。
即係咁，反對派政客平時最鍾意賴地硬，上次特首同埋律政司司長親自就兩名小學雞宣獨問題提出司法覆核，佢哋就上綱上線，話係行政干預立法，係政治打壓喎，今次由市民出手，反對派應該冇嘢好賴喇啩。講真，人大釋法將《基本法》有關條文解釋得好清晰，議員宣誓必須莊重及誠實，呢班人係都要玩嘢博出位，畀人挑戰資格都冇咩好怨囉。再講吖，立法會本來就係建制嘅一部分，反對派政客既要進入建制，貪議員薪高糧準，又唔想守足規矩，天下邊有咁嘅道理o架。
可能有人會話，八名反對派政客冇份播獨，咁都受到株連，似乎無辜咗啲喎。其實昨日因，今日果，釋法的確由兩隻港獨小學雞引起，之但係其他反對派政客唔止冇同兩隻小學雞劃清界線，仲要充當保護傘，大家睇得清清楚楚，擺明就係港獨幫兇喇。呢，前幾日爆發嘅「佔領西環」事件，就有部分反對派政客嘅身影，咁你話佢哋有邊一忽係無辜呢？
家陣冇嘢驚，最驚係港府無能啫。正如有人話齋，人大釋法係好經，但如果畀歪嘴和尚唸歪，咁就神仙都難救。大家有眼見，香港話就話三權分立，行政主導，實際上三權對立，司法獨大。律政司同司法機構向來偏袒反對派，但凡涉及佢哋嘅官司，無一例外高高舉起輕輕放下。好似三名佔領學生領袖咁，唔止被法官輕判，仲將佢哋當成英雄咁拜，至於佔領搞手及幕後黑手仍然逍遙法外，就更加唔在講。所以話啫，當局最終係有法必依定係陽奉陰違，真係要睇過至知。
點都好喇，立法會係議政同埋立法嘅地方，絕對唔係政客搞破壞同埋宣獨嘅舞台，反對派長期玩嘢，阻住地球轉，唔少市民早就忍無可忍。家陣中央開埋路掘埋井畀港府撥亂反正，如果官老爺仲係前怕狼後怕虎，不如自動下台讓賢喇。