政情：公民講場：教書撞正開會 一舊雲遭挑戰

立法會發展事務委員會早前否決成立「跟進橫洲發展項目事宜小組委員會」，多名缺席嘅民主派議員被炮轟，「失蹤人口」之一嘅民主黨（白鴿黨）黃碧雲（一舊雲）事後解釋逢星期二要去理工大學教書。由黃台仰做發言人嘅本土民主前線（本民前）就為一舊雲計數，喺社交網站貼文，指直至明年七月底休會為止，一舊雲有份參與嘅會議之中，有五十五次撞正星期二，擺明向佢挑機喇！一舊雲就反駁話自己只係上晝九點半至中午十二點半教書，大部分嘅會議係喺下晝先開始，一定趕得切咁話，仲叫對方挑機前先溫書。