政情：胡官自爆未完成放棄英籍程序

卿姐嘲梁君彥事件翻版

胡官喺訪問中自稱「愛國愛港」，卿姐問佢係咪持有外國護照。胡官自爆九三年任高院法官時獲當時政府畀英國護照，同時獲派居英權，被問點解選擇接受，佢反問「有人畀你點會唔要」。佢話已申請退出英籍，但唔記得申請日期，估計喺兩至三個月前開始申請，本來以為程序好簡單，所以遲處理，強調唔係準備不足，有信心提名前可以完成程序。

卿姐嘲胡官會唔會學梁君彥問英國政府「拎快證」，胡官強調無要求中央政府或香港政府協助，但反問「快證又點啫！」卿姐又話市民對官員有期望，希望佢可以提早完成程序，又形容國籍問題重要，否則朱凱廸唔會去英調查梁君彥事件。對於揭發胡官未完成放棄英籍，卿姐笑稱自己係「寶刀未老」添！