尋日有兩單新聞備受香港人關注，第一單梗係美國總統大選啦，狂人特朗普當選令港股應聲急挫，小股民損失慘重。第二單咯喎，之唔係新一年嘅《米芝蓮指南》出爐囉，香港人出名識飲識食，摘星食肆肯定客似雲來咯。
不如睇吓今年有幾多食肆摘星先喇。今年榮獲三星嘅本港餐廳數目同去年一樣，繼續維持六間，全部係高檔貨；而獲得二星榮譽嘅食肆有十四間，兩間仲係新上榜添，可喜可賀；至於獲得一星榮譽嘅食肆更多達四十一間，當中七間新上榜，包羅中西各國美食，證明有麝自然香，香港「美食天堂」呢個朵真係當之無愧(口架)。不過講到最令港人驕傲咯喎，莫過於今年有二十一間平民小食店獲納入「街頭小食店」欄目，反映香港街頭小食已經成為世界級美食，唔巴閉就假。
對於餐廳嚟講，獲得車胎人加持當然係至高無上嘅光榮喇，除咗係對出品嘅肯定，仲可以吸引更多顧客慕名光顧。好似一間摘星嘅點心店咁吖，日日大排長龍，分店愈開愈多，好風光(口架)。不過凡事都有兩面，米芝蓮帶挈食肆財源廣進嘅同時，亦成為唔少食肆嘅「死亡之吻」，尤其係缺乏財團支持嘅個體戶，摘星後被業主瘋狂加租，部分仲搞到黯然結業。呢，一間去年獲得街頭小食推介嘅中式糖水舖，被業主大幅加租逾倍，卒之要搵地方搬，如果旅客跟住指南嚟搵食，實行摸門釘都似。咁仲唔止，今年嘅一星榜之中，有三間已經結業，原因又係租金問題，都咪話唔無奈。
所以話啫，人怕出名豬怕肥，食肆最怕加租，有啲業主郁吓就加租，見到租客米芝蓮摘星，仲唔飛擒大咬咩。其實業主咁急功近利，同殺雞取卵冇咩分別嘅咋。有辦你睇，過去最多外籍人士搵食嘅中環蘇豪區，家陣水盡鵝飛，單係士丹頓街已經有十七間吉舖，大部分前身都係食肆。尖沙咀諾士佛臺亦唔好得幾多，有餐廳負責人大呻生意暴跌，原因係高端旅客減少來港，本地外籍客又因為減薪裁員而唔願消費，偏偏租金就火箭咁飆升，都唔知捱得幾耐。有人話飲食業係經濟嘅寒暑表，中高檔餐廳吊晒鹽水，只有平民快餐店生意有輕微增幅，香港經濟有幾差，唔使講都知喇。
冇計嘞，香港就係一個咁畸形嘅城市，不論市面氣氛幾差都好，高地價、高樓價、高租金呢「三高」依然不動如山，莫講話食肆頂唔順，小市民想上車一樣難過登天。香港地搵食艱難，安居樂業又無着落，民怨沸騰有乜出奇吖。