政情：公民講場：主席位坐唔暖 梁君彥開會要「降呢」

梁君彥喺選舉立法會主席前備受外國國籍問題困擾，做到主席之後都唔見好得去邊，過去三次大會唔係流會就係休會，好似上周三嘅大會亦因為混亂而需轉場去會議室一，但又因為青年新政議員游蕙禎同梁頌恆聯同十幾名助理硬闖會議，導致六名保安受傷而要休會，尋日游梁冇再衝擊大會嘞，但又因驅趕民主黨嘅「乳鴿」許智峯，趕極都唔肯離場，最終又要轉場開會。一而再梁君彥都唔可以喺會議廳主持會議，反而要「降呢」去番上屆佢做內務委員會主席嘅會議室先開到會，唔通會議廳張主席椅同佢唔夾，有針拮嘅，搞到佢坐極都坐唔穩？