政情：今日你上鏡：囝囝交叉感染 郭偉強戴口罩

轉天氣一時唔小心好易會病，呢兩日本港天氣就涼咗好多喇。立法會議員郭偉強尋日就戴住口罩返立法會開大會，莫非佢都中咗招？郭偉強就話，因為天氣轉涼，佢囝囝病咗，咁為人爸爸當然要照顧囝囝啦，但點知一個唔小心就交叉感染，搞到佢都好似作感冒。佢又話因為費事再將啲感冒菌傳染畀其他人，所以都係戴番個口罩喎。立法會咁多議員出入，班議員又成日口水花四濺，戴番個口罩確實係安全啲嘅。