政情：葉劉質詢 噏唔出「疊床架屋」
立法會大會尋日終於進入議員口頭質詢環節，新民黨葉劉淑儀指有關證券及期貨事務監察委員會同香港聯合交易所有限公司今年中出咗份聯合諮詢文件，建議增設上市監管委員會同上市政策委員會，但佢就覺得現行負責上市審批權嘅上市委員會已經運作得好，唔明點解要加多兩個委員會，問官員點解要「喺間屋疊多張床㗎」？
口快講「喺間屋疊多張床」
咦！乜嘢叫「喺間屋疊多張床」？估計葉劉其實係想講「疊床架屋」，呢個四字成語意思係喺床上面放多張床，喺間屋上面起多間屋，比喻重複同累贅。
好多議員經常都用呢句嚟鬧政府開新部門或設立研究小組，點解葉劉噏唔出呢？無論點都好，只要聽得明，知道意思係乜就得喇！